Parties Caan Dun

Oiy tank deh Laud feh bringing meh through anuhda year. Oiy don’t do too much now-a-daz, because ah deez two knees ah moine. But as far as deh news guh, oiy duz mek sure oiy keep up. So when meh friend dem, young en ole, come to see meh, dem does bring meh deh latest news too. Sumtoimes teh duh be funny, sumtoimes sad, sumtoimes concerning and sumtoimes bad, but wah oiy loike is deh politics.

We here in 2026 so dah mean next year suppose to be election. Oiy hear tis bout sewen party mek up feh next year. Ah here one from Easten, Walwyn en he Alliance, Dem seh Mark bringing one too and deh United Party coming back, plus yo hawe to count NDP en VIP, dah en sewen? Weh dem going tuh find all dem people to mek up deez parties?

Dem in deh opposition can’t ewen come tuhgether to form one party, so dem decided to split demself into three and some ah dem dun start joining other party too. Who dem think dem going to fool bout dem here feh we deh people dem. If dem caan wuk tuhgether how dem going to wuk feh we. Dem nuh why them want power en since it een feh we den it must be feh demself. Maybe dem just want deh six figure salary which wuz approwed through deh Greedy Bill or maybe more. Ah set ah jokers oiy duz call dem.

But tink about it duh, deh reason why so much parties forming is because dis gowerment een doing ah good job and ewerybody beliewe dem cud do better. Das why so many parties forming, but dem only going to mek it easier feh VIP to win agen, because VIP people dem don’t split dem wote ah tall.

Dem need to guh siddown en stop dem frig according to deh young Davies guide. Dem only meken poppy show out ah demself. Dem better don’t come by me next election because if yo put them all in a bag oiy don’t nuh which one going come out fuss. Tis loike six ah one half a dozen ah deh next.

Well, that’s my two-cent worth.